立法會原定今日早上會先同沙田區議會喺立法會（圖)進行會議，中午再一齊喺立法會宴會廳同出席嘅沙田區議員食晏。向來最鍾意同建制派主導的區議會交流嘅一班建制派立法會議員，據知早前都有唔少人報名，點知後來佢哋收到中聯辦邀請，同日要去西環午宴，令到一班建制派議員相當尷尬，原本報咗名嘅都要全數甩底，放班沙田區議員飛機。
身為今次交流活動召集人嘅工黨張超雄接受八方查詢時話，最初立法會秘書處都話有10幾個不同黨派議員報名參加午宴，但現時由於西環吹雞，全部建制派都要畀面西環而甩底，所以相信最終陪到沙田區議員食晏嘅立法會議員，可能只有民主派嘅議員喎！不過又係嘅，一邊只係自己友嘅區議員，另一面係西環呢個「老細」，建制一定識揀喇！