隔牆有耳︰車公早預示廚師腸復活 - 李八方

舊年「美國廚師牌雞肉腸」嘅生產商Zacky Farms宣佈申請破產保護，當時話廚師腸亦會停產，由於呢隻腸好多香港人由細食到大，真係食開有感情，令到香港一度出現搶購廚師腸潮，不過廚師腸嘅香港代理大昌行噚日喺「DCH ValleyChef」嘅facebook專頁宣佈，廚師腸好快又會再供應。

網民見廚師腸又再有得賣固然開心，但竟然有網民發現，年初二鄉議局主席劉業強為香港求得嘅車公86籤，將四句籤文最後四字串起，竟然係「常得香腸」，認為車公籤文早已預示廚師腸「復活」嘅消息，認為籤文好靈驗！不過亦有網民覺得有啲穿鑿附會，其實籤文靈驗與否，都係睇人信唔信，信則有不信則無。