特首林鄭月娥因為長者綜援單嘢辣㷫民主派，加埋之前林鄭政府又DQ自決派參選資格同搞國歌法，民主派議員決定集體杯葛今年立會請埋娥特嘅新春午宴，不過明顯無影響娥特同班建制議員心情，繼續飲飲食食、風花雪月，成班冇去嘅民主派議員仲無端「被代表」，由立會主席梁君彥夾硬代佢哋歡迎娥特！
冇咗民主派議員出席新春午宴，娥特入場時冇晒示威抗議、冇議員帶住一堆問題一路食飯一路質問出席官員，娥特同佢班官仲有一眾建制派議員明顯放鬆晒，埋位食飯前各自風花雪月吹水，連梁君彥致辭都明顯輕鬆咗，佢先代表埋冇出席嘅民主派議員，用「全體立法會議員」名義歡迎娥特首同司長、各官員及行會成員出席立會春茗，可能見在座全部自己友，之後仲越講越開心，佢講到今年係豬年，豬嘅外形圓潤敦厚，跟住望住張華峰坐嗰邊，笑住問：「我哋華峰哥係邊度啊？」惹來全場大笑。
另起爐灶搞新年飯局
成班建制派同娥特、官員坐埋一齊嘻嘻哈哈，民主派議員唔同佢哋玩，但唔代表民主派唔搞新春飯局。民主派會議召集人毛孟靜同八方講，民主派議員會另起爐灶自己搞新春飯局，咁同聲同氣一齊食飯賀新年，點都好過對住娥特同班建制派。
李八方