沙田陳太話想唔到買巴西雞翼會牽涉到碳足跡，氣候轉變，內裏隱藏階級對抗嘅問題，覺得世間事如此複雜，怎麼管得了，佢話，去到大埔街市買菜買肉，如果要考慮埋碳足跡，腦袋一定會打結，不如首先請政府搞掂日常嘅垃圾處理問題先，食完巴西雞翼，餘下嘅骨頭應該如何處理？
此事又係高深學問，睇林夕寫台灣人如何處理垃圾分類，有好多規則，少不免涉及收費，又係要講錢，分類完之後，何者再循環，何者可收費焚化掉，何者送往堆填區，在在需財，以香港地少人多，土地昂貴嘅情況嚟睇，建設三四個焚化爐（最新科技科學化之焚化爐，可去歐洲澳洲取經）以輔助堆填區，睇怕較為實際。但一講焚化爐，環保人士又有爭議，議論不止。
沙田陳太聽到一頭煙，話唔好再講咯，留番畀林鄭特首與局長處理啦。當日晚上佢要同男家親戚吃自助餐，到沙田凱悅酒店去也，沙田凱悅咖啡室以往經常滿座，唔易訂位，但陳太一打電話去就訂到十幾人枱，佢都有少少意外，不過食完之後，佢報告話：「細路搏命食甜品，唔捨得走，大人就冇乜好食，好彩叉燒幾好外同埋三文魚刺身幾正。食完就知道點解即日可以訂到位。」
算了罷，新年食自助餐無非係想細路高興嘅啫，姑媽孫女聰明伶俐，在馬鞍山一間學校讀小學二年班，中文及算術都極高分，學校話要佢入精英班，原來所謂精英班，就係微調教學語言，由廣東話改為英文，用英文教算術，孫女C嘅成績立即倒退。點解精英班要用英文？簡單到極，自從董特首正式將香港學校分為英中與中中之後，中中唔准用英語教學，英中唔准用中文教學，英中物以罕為貴，位位家長都想子女入英中，故此一般小學（唔係女拔，男拔附小一類）就搞精英班，一校兩制，精英用英語教，目的係希望學生能夠容易啲入到英中。沙田陳太聽見姑媽孫女怕英文，即時林鄭月娥上身，但唔問三歲小童暴龍嘅英文係乜，深得滯吖嘛，問孫女C，你食飯嘅水果係乜呀？答：「西瓜！」問：「西瓜英文係乜呀？」孫女C瞪大對眼，搖頭話：「唔記得。」又問：一杯水嘅英文係乜？小女孩又搖頭，於是轉問佢阿媽：「佢平時冇學英文嘅咩？」阿媽苦笑：「我唔識英文，平時喺屋企教佢算術中文，佢就進步得好快。」陳太心諗自己又犯忌嘞，識得答林鄭月娥問題（暴龍英文係乜）嘅小童，肯定屬另一個，與一般平民學校有階級差距（class divide），香港兒童自小如此，長大後香港社會怎麼不分歧。