除咗一班名人富豪跑渣馬，一班官員都有落場跑，不過就跑唔同賽程，好似財爺陳茂波就只係跑「領袖盃」，政制及內地事務局局長聶德權就唔係講笑，直接跑半馬，今年嘅成績仲比佢舊年紀錄快咗。
八方見財爺噚日跑領袖盃都跑得好輕鬆，不時同參賽者傾偈握手，咁話晒邀請賽成績只係次要，總之志在參與，唔好計較啦！
不過聶德權就認真參賽落場跑半馬，今次已經係佢第三年參加，佢跑緊期間有記者問佢跑成點，佢話噚日都有啲風，跑得都算幾好。今年佢2小時4分鐘跑完，快過去年五分鐘。被問到政改係咪好似長跑一樣係長途賽？佢話要睇市民意願同《基本法》規定喎。至於特首林鄭月娥就冇落場跑，只為全馬賽事起跑擔任主禮嘉賓，今次娥特雖然有遇示威，但冇乜人噓佢，比較陳茂波上次去馬場俾人噓到暈，娥特今次算好彩。