萬人迷碧咸早前入股英格蘭第五級球隊沙福特城，同其餘5位「92一代」球星，包括加利利維尼、菲臘利維尼、傑斯、史高斯同畢特齊齊過老闆癮。碧咸噚日就首次入場睇沙福特城嘅比賽，不過就腳頭麻麻，球隊領先一球下，最尾都要輸1:3。
咸爺前日帶埋仔仔羅密歐同一班好友齊齊入場，會合菲臘仔一齊欣賞沙福特城比賽。咸爺一到場當然成為全場焦點，唔少球迷立即上前將佢包圍，要求合照同簽名，造成混亂。不過，咸爺入場似乎唔能夠刺激球隊表現，最終沙福特城主場以1:3輸畀杜化。雖然輸波，但場波除咗咸爺外都有看點，沙福特城中場普列特（小圖）上半場離門45碼遠射破網，令人諗番起1996年，當時效力曼聯嘅碧咸對溫布頓球半場笠射，連加利仔賽後都喺Twitter表示，普列特呢球射門令佢勾起過去睇過嘅射門。