皇家馬德里球星加里夫巴利計劃同青梅竹馬女友艾瑪（Emma Rhys-Jones）結婚，佢仲已經計劃好晒，打算喺今個夏天租一個私人島嶼嚟搞婚禮。不過由於女家嗰邊牽涉到好多麻煩事，巴利可能擔心有人對佢哋不利，所以打算請武裝警衞確保婚禮安全舉行。巴利安全至上，但皇馬後防似乎就冇乜安全感，周日西甲早場主場迎戰弱旅基羅納，竟然爆大冷先開紀錄下反輸1:2，開80倍半全場「主客」。
巴利同27歲嘅艾瑪育有三名子女，佢哋上年原本打算喺意大利托斯卡尼嘅一個城堡進行婚禮，但最尾因為艾瑪屋企發生糾紛，所以最尾搞唔成。英國《太陽報》就話，巴利打算將婚禮改喺西班牙一個叫Tagomago嘅私人島嶼舉行，仲會請武裝警衞維持秩序，有啲警衞仲做過英國特種空勤團（SAS），認真大陣仗！
只邀150人出席婚禮
報道仲引述知情人士話，巴利只會邀請150人出席婚禮，唔受邀請嘅人，係完全冇機會靠岸。不過巴利嘅擔心唔係冇道理，事關艾瑪嗰邊牽涉好多麻煩嘢，佢爸爸馬田就因為涉及洗黑錢、詐騙等罪，2016年喺美國紐約被判監6年。麻煩事唔止一單，艾瑪嘅其中一位家庭成員更加被指同黑幫有聯繫，上年嗰位成員因為偷走咗75萬鎊（約750萬港元）嘅毒品資金，最尾搞到滿城風雨。
講返周日場西甲，皇馬爆冷主場以1:2不敵基羅納，聯賽五連勝強勢告一段落。皇馬喺25分鐘先開紀錄，卻奧斯右路高波斬中，卡斯米路接應一頂入網，半場領先1:0。
下半場戰情完全逆轉，皇馬隊長沙治奧拉莫斯65分鐘喺禁區犯手球，攞黃牌之餘仲輸12碼，基羅納由史杜安尼主射入網，追成1:1。巴利喺67分鐘入替馬高斯阿辛斯奧，但七分鐘之後皇馬失多粒，基羅納翼鋒安東尼羅辛奴嘅勁射俾泰拔高圖爾斯撲出不遠，被伏兵遠柱嘅樸圖射入網。
後備落場累皇馬反輸
去到尾段皇馬仲要打少個，90分鐘拉莫斯倒掛攻門，但踢中基羅納守衞柏祖艾卡拿，兩黃一紅被趕出場。基羅納最尾贏2:1，呢場亦係佢哋創會以嚟，第一次喺巴拿比奴擊敗皇馬！至於皇馬嘅死敵巴塞隆拿，上個禮拜六作客華拉度列，憑美斯射入12碼，最終以1:0險勝對手，又拉開領先優勢。