曼城上周六喺英格蘭足總盃第五圈作客英乙嘅紐波特郡，喺上半場互交白卷下，憑18歲小將菲爾科頓喺比賽末段梅開二度，終以4:1淘汰對手，晉身八強。藍月今戰雖然只係面對乙組仔，但依然派出利萊辛尼、加比爾捷西斯、大衛施華同艾達臣摩拉斯等主力，但全場有23次射門嘅曼城上半場竟然咬唔入對手，要踢到51分鐘，先靠上半場曾經射門中楣嘅利萊辛尼，接應加比爾捷西斯傳送破網，助球隊領先1:0。到75分鐘，18歲小將菲爾科頓為曼城射成2:0。落後兩球嘅紐波特郡喺88分鐘由艾蒙「士哥」追成較接近嘅1:2，但開心唔夠一分鐘，菲爾科頓又入一球，藍月將比數拉開到3:1，加上馬列斯補時埋齋，曼城結果以4:1擊敗紐波特郡，有驚無險入八強。