密鑼緊鼓的奧斯卡頒獎禮，醜聞一宗接一宗，最新出爐的一單業界萬眾一心群起砲轟，連平日講嘢陰聲細氣的謙謙君子李安，公開場合鬧人罕見過雞屙尿，也破例高調扯火，聯同塔倫天奴、史高西斯、史碧李等等荷里活名導，齊聲譴責美國演藝學院太離譜。究竟什麼辣㷫這班大哥大，令素來唔興表演勾肩搭背的他們，忽然站在同一陣線同仇敵愾？是咁的：每年盛會全球直播，都被詬病拖得太長，無計可施之下勒令得獎者上台致詞三分鐘內完成，限時限刻到連阿媽都冇位多謝，怨聲早已載道，可是問題並未因打壓雞啄唔斷的長氣袋而解決，今年主辦當局居然諗出一條屎橋，話要把攝影、剪接、短片和化妝四項最佳，安排在廣告時段播出，係咁意打發掉一般觀眾覺得無甚看頭的項目，讓屬於廁所的歸於廁所位。嘩，冇人嘈先至有鬼，「歧視」這條神經線，在美國人體內特別發達，早已是公開秘密，否則也不會遭別有用心的「意見領袖」興高采烈鑄造成好使好用的「左膠」，如此明目張膽大細超，抵佢畀人圍剿。
當你係廣告，在電影人眼中當然帶不尊重成份，話晒都係artistes噃，怎能和滿身銅臭的商家平起平坐，可是敏感的廣告人有權維護自己，以「難道二奶唔係人」的邏輯，排眾而出來個反反歧視：同我哋排排坐好委屈你咩，影片植入廣告睇得多，廣告植入頒獎不外禮尚往來，應該與有榮焉才對呀！更何況，電影導演冇工開等錢使，或者發老姣想買花戴，不是面不改容拍廣告搵快銀嗎，這樣大啖大啖反咬餵自己的手，不是恩將仇報是什麼？