渣馬周日冷雨中開跑，六萬幾人一心跑向維園，而一班名人富豪就參加1.8K「領袖盃」，向住「一帶一路」進發，當中包括54歲嘅行會召集人陳智思（Bernard）。Bernard平日做開運動，以佢年齡同背景，絕對係跑超級大長途嘅黑馬，只跑短途真係小兒科，八方見佢衝線時氣都冇喘，好似熱完身咁咋！
盧寵茂陪老婆跑
同樣都係50幾歲，有「鐵醫」之稱嘅港大深圳醫院院長、瑪麗醫院肝臟移植中心主管盧寵茂（58歲），長跑紀錄彪炳，跑過兩次全馬、一次半馬，六年前因為膝患減少跑步；佢話今次落場，志在陪Banker老婆跑，讚大會今年急救安排有進步，「以前我好似唔覺有呢啲設備（AED），但今次明顯多咗，希望可以避免意外發生」。佢自評落場表現99分，「好彩我唔使用（AED）」。
除咗呢班據勞福局局長羅致光定義、接近60歲嘅「中年人」落場外，一班過咗「中年」冇耐嘅富豪都有去跑，好似九倉吳光正都有上陣，現年73歲嘅佢同廿幾年前run首屆特首時一樣咁fit，如果佢再run（八方嘅意思係長跑……）真係睇得又跑得；另外論身形狀態都係大富豪級數、今年66歲嘅新地郭炳聯都有跑，佢話平時都有行山，為咗參賽，早兩星期前開始練習，專登請教練特訓備戰；另一名人盛智文睇落都幾fit，年屆70跑短途都好輕鬆。而領袖盃參加者之中，霍啟剛應該係比較後生嘅一個，今年40歲嘅佢相比之下算係「青少年」，雖然略為負重磅，都輕鬆完成比賽。
李八方
