上季日職冠軍川崎前鋒喺上星期六嘅日本超級盃，憑新加盟嘅倫敦奧運男足神射手李安度達美奧一箭定江山，1:0小勝天皇盃冠軍浦和紅鑽，首次贏得呢項賽事冠軍。
今場雙方嘅新兵都正選上陣，川崎前鋒有2012倫敦奧運神射手達美奧，而浦和紅鑽亦都有今季由大阪櫻花加盟嘅日本國腳杉本健勇。川崎係上半場較主動嘅一方，喺32分鐘就靠一個罰球戰術由谷口彰悟近門射入，可惜佢越位在先入球無效，上半場雙方半場互無紀錄。
換邊後川崎前鋒繼續採取主動，52分鐘達美奧遠柱接應傳中再傳畀中村憲剛，後者近門起腳被擋出，達美奧混戰之中快一步起腳破網。雖然浦和紅鑽喺尾段傾力反撲，可惜始終無辦法追平，川崎前鋒最後保住1:0勝局，首次捧走日超盃。