沙田陳太睇報紙，見到香港超級環保癡林超英勸人少吃巴西雞翼，碰啱佢前一日先至買入巴西雞翼一斤，感到有啲愕然兼內疚，乜自己咁冇常識㗎，前天文台長話唔好食巴西雞翼噃，於是打電話問左丁山點樣解釋林前台長之言。
左丁山略知少少，於是扮代表，向沙田陳太解釋：巴西雞翼並非有病毒，香港有食安檢查，點都唔會用半隻眼去目測檢驗嘅啫。林先生係科學家，研究氣候變化，對世界環保組織所倡議嘅「碳足跡最少化」（Minimum carbon footprint）好上心，碳足跡就係指巴西雞翼從巴西港口運到嚟香港，路途遙遠，消耗日程、每日在貨船上嘅碳排放份額有一定數量，如果我地食深圳農場雞翼，咋一聲就運到香港，故此我地支持環保嘅話，就要食深圳雞翼，達致「碳足跡最少化」，如果吃巴西雞翼，直情就係「碳足跡最大化」，極不環保。陳太聽完，即刻反駁：「如果係咁，不如食元朗農場雞翼，碳足跡仲少啦。」
此言有理，可惜世界上已難有「自給自足」呢回事，如夾硬推行，成本會貴得驚人，例如日本一向緊守「食米自足政策」，視之為國家安全事項，其實係為咗保護農民收入，故此設關卡阻礙外國食米入口，更津貼農民種米。結果呢？日本米係靚呀，係好食呀，但已成為稻米奢侈品，日本人自己都食唔起。如果香港自己養雞供應香港人所吃之雞翼，要幾多個農場先至夠？要幾多公頃土地？香港養雞，所得之雞翼，會便宜過買巴西雞翼？唔好講笑啦！
講食物之carbon footprint，自然係個理想，但並不實際，有時簡直離地，係學院派與富裕階級想出來之空議論。講環保，好有階級性，亦甚為分化社會。大家都唔會否認目前天氣反常，北半球冬天凍至零下五十度，南半球係夏天，澳洲高溫至正五十度，差距驚人，地球人係應該盡量慳電、慳食，多行路少用車等等嘅，但講到食物供應，就係講全世界互通有無嘅供求關係，叫香港人與新加坡人食自己農場食物，作消遣則可，全面復耕就係儍人先至會講。
每次國際上召開全球氣候會議，富國與窮國必定鬧大交。以往西方富裕，由自由派當政，猶肯讓窮國半步，但中國厲害了之後，西方睇見就眼紅，特朗普上台，更加認為中國印度搵美國笨，故此退出巴黎氣候協定。如叫中印今年就要依足歐盟環保標準，好多中印工業都要收檔，中印又邊度肯應承吖！