喺上星期二歐聯16強首回合輸畀巴黎聖日耳門（PSG）後，曼聯星期一就要出戰英足盃第五圈賽事，作客同佢哋喺英超前四爭崩頭嘅車路士。不過領隊蘇斯克查就先同大家公佈兩個壞消息，就係喺對PSG場波受傷嘅連格同安東尼馬迪爾，都冇可能喺星期一場波上陣，甚至連月底嘅雙紅會都唔使預佢哋，唔通紅魔咁快就過完蘇B上任後嘅蜜月期，喺呢段地獄賽程中即刻跌番入深淵？
對PSG場波，連格同馬迪爾都先後喺半場受傷退下火線，而最終球隊亦以0:2落敗。連格賽後證實係拉傷腿筋，馬迪爾就腹股溝有傷，經過呢幾日檢驗後，蘇B終於同大家簡單交代佢哋兩個嘅傷情，：「目前為止，我認為佢哋會缺陣兩至三個星期。」由於曼聯呢段時間真係大戰連場，絕對負擔唔起連折兩位大將嘅風險。佢哋星期一就要先同車仔喺英足盃第五圈較量，呢個盃可以話係紅魔家陣最後奪標希望，出埋局就真係可以宣佈今季四大皆空；之後星期日要返英超踢雙紅會，所以連傷兩主力真係好閉翳，仲分分鐘影響埋蘇B下季想坐正做魔君嘅機會。
蘇B：繼續進攻足球
事實上，曼聯進攻選擇唔係少，如果連格同馬迪爾踢唔到，仲有盧卡古、阿歷斯山齊士同桑馬達可以頂上，但弊在以上呢班人嚴重缺態，尤其盧卡古同山神，同曼聯踢法完全格格不入，幫助好有限。不過，蘇B依然好淡定咁話：「我哋要繼續踢出心目中嘅最佳足球，就係崇尚積極嘅進攻足球，就算作客車路士同迎利物浦，都希望可以主導場波。無疑輸波後感覺係有啲唔同，但耿耿於懷冇意思，我哋要重新出發。」
傳睇中蜜蜂兵辛祖
唔知係咪覺得有好多冗員可以喺暑假清洗，所以蘇B另一方面唔理季後仲有冇得揸旗，都期望可以幫球隊引入新血，近日傳出佢睇中今季喺多蒙特上位嘅英格蘭新星查頓辛祖，希望出價至7,000萬鎊將佢買入。辛祖跑得快，啱晒蘇B口味，而佢另一個身份係曼城舊將，如果可以簽佢返嚟仲可以寸吓死敵，家陣就要睇吓辛祖自己有冇興趣，同埋多蒙特肯唔肯咁快放佢走。