皇家馬德里呢排是非多多，陣中兩大主力亦可能會被罰停賽。話說隊長沙治奧拉莫斯喺周三歐聯16強首回合對阿積士嗰陣拎咗今屆嘅第三面黃牌，但就被人話佢「洗底」，等佢之後淘汰賽唔怕要坐波監，佢賽後亦認咗係專登咁做。不過按歐洲足協規定，特登拎牌可能會被罰停兩場，2月28日佢哋就會就呢單案進行聆訊。至於另一主力加里夫巴利就可能要停耐啲喇，事關佢上輪西甲對馬德里體育會嗰陣入波後嘅慶祝手勢被人話有挑釁成份，聽聞西甲賽會已經發出聲明，話如果證實呢個動作帶有敵意，巴利就會被罰停賽4至12場比賽。巴利喺呢場馬德里打吡度拎到效力皇馬嘅第100個入波，點知入波都會搞到咁麻煩。