年初七人日係吉日，中午係吉時，於是循舊例坐的士去車公廟祈福求籤，大部份香港人在人日已經開工，到車公廟人群減少，但廟內仍然擠擁，因有不少人到來「團拜」，睇落有長者蛇齋餅糭團、內地旅行團、泰國人旅行團等，左丁山到過車公廟無數次，近年好似見多咗年輕女士團，此日亦不例外，唔知啲年輕女士係當時興流行拜車公吖，還是回歸阿媽傳統呢？
一切例行儀式做齊，如上香、參拜、拜太歲、拜財神、轉風車、打鼓之後，當然就係求籤，有人話係迷信啫，不問蒼生問鬼神，不可信，但自從何志平以民政事務局局長身份在2003年2月2日年初二求得下籤83籤之後，是年發生沙士事件，百事不吉，經濟不景，樓市大跌，香港衰到貼地，車公大名更加傳遍世界，海外華人來港旅行，有時間亦到車公廟一遊，或者因為咁，本地年輕女士亦喜歡到車公廟趁熱鬧。
左丁山自己求得中籤，大意係凡事小心，可得平安，中六合彩就一定冇份。每年有好朋友知道左丁山拜車公，要求為她求一籤，去年求得中籤，算是不過不失，生活平穩，略有進賬。今年呢，嘩嘩嘩！竟然為她求得第57上籤：「掠地收弓膽氣雄，衣冠脫罷志猶沖，小鬼邪魔皆拱伏，此時誰敢與爭功。」左丁山笑佢：「你又唔係特首，要咁巴閉做乜，因住功高震主，令別人患上眼紅症篤你背脊講你是非呀！」
籤文如何解釋，任得你，車公廟內有不少人排隊搵一眾師傅解籤，以年輕女士為多，以後多啲女性求籤嘅話，解籤師傅亦能有更多生意，其實香港人解籤，可以各自表述，信者自信，不信者會唔聽、唔理嘅啫。譬如今年年初二（2月6日），鄉議局主席劉業強為香港求得86中籤：「石田為業喜非常，畫餅將來未見香，怎曉田耕耘不得，那知餅食不充腸。」劉業強話：「香港底子好，儲備夠，係福地嚟。」麥玲玲話係明日大嶼呃自己。問大編輯，大編輯話：「直情係神來之筆，枉費我地做幾十年傳媒都諗唔出咁嘅標題來形容林鄭經濟政策，車公八個字講晒；石田種米，畫餅充飢！」如果真係咁，香港人有排捱。石田種米，源出伍子胥諫夫差勿伐齊，吳王不聽，伍子胥自刎而死，凶兆也。但地產L有21世紀解籤方法，佢話：「石田用來種米，當然死梗，但開發石田起樓，就地基鞏固，故此石田為業喜非常，香港靠地產呀！」好似又解得通喎，香港上一季農業GDP數字加埋唔夠五億元，買到間山頂獨立屋，直情係「田耕耘不得」，農地變棕地，民意係要將棕地起樓，唔係復耕也！