環境局局長黃錦星同好多支持環保人士一樣，一直身體力行推動環保，但如果因為堅持環保不惜搞到辣㷫太太，就真係唔係人人敢做！
話說黃錦星噚日同一班學生交流，佢先講自己都係基層出身，童年住過深水埗板間房，當時一家七口瞓一張碌架床，父母就瞓上格，佢哋五兄弟姐妹加塊板就瞓下格；但最後佢都成功捱出頭，所以勉勵學生唔好怕捱苦。咁啱噚日情人節，黃錦星話會買禮物畀太太，至於送咩？佢就話唔話你知喎！但講咗一件為堅持環保不惜辣㷫太太往事。話說局長係冬天生日，所以太太每年都會送一件冬天衫畀佢，但有年佢覺得似乎唔環保，於是同太太講上年、上上年送畀佢嗰幾件衫只係着咗幾次，仲好新淨啊，叫太太生日唔使再送新冬天衫。太太聽到佢咁講，即刻嬲咗！