情人節大家過成點？前英格蘭隊長朗尼就未必好過喇！事關朗尼幾日前先被踢爆，飲酒飲足10粒鐘仲要私會金髮女，老婆高蓮當然冇癮，英國嘅《太陽報》仲影到高蓮出街買嘢嗰陣，已經除低咗結婚戒指！報道仲講到如果朗尼唔肯戒酒嘅話，高蓮就會選擇離婚，睇嚟今個情人節對朗尼嚟講，似係愁人節多啲囉！
喪劈拖女斷正
朗尼雖然同老婆高蓮結婚超過10年，但朗尼飲酒偷食嘅負面新聞其實冇停過，話說上年12月，33歲嘅朗尼先因為喺公眾場合醉酒行為不檢，搞到俾華盛頓警方周咗，不過呢位英格蘭前鋒依舊少理，事隔唔到幾個月，又繼續飲酒媾女。
就上個禮拜，朗尼跟隨效力嘅華盛頓聯隊，去到佛羅里達州集訓時又再出事，當地狗仔隊影到朗尼由晏晝四點幾，一邊飲酒一邊睇超級碗，之後轉場繼續同隊友狂飲，去到夜晚11點幾到隊友走晒，朗尼就搵嚟早幾日先識嘅酒吧女郎露絲基再飲，據指女伴仲邀請佢再次轉場，兩個仲一齊坐女方架車走人，酒後佢哋再喺車上單獨相處到凌晨兩點幾，做過乜就冇人知，不過有圖有真相，前前後後朗尼飲足成10粒鐘就一定堅嘅！
再唔戒酒高蓮要離婚
私會金髮女單嘢爆出之後，據報高蓮阿媽家陣已經飛咗去美國華盛頓陪個女，呢個時候狗仔隊出場喇，仲影到高蓮買嘢嗰陣兩隻手都冇戴戒指，睇嚟高蓮真係好嬲。兩公婆今個情人節要分開過，高蓮依然好有雅興咁買咗四個情人節波波同幾個仔一齊過節。
報道入面又提到高蓮為咗佢同朗尼嘅關係，過去咁多年其實付出好多，例如要離鄉別井跟老公過美國，人生路不熟又冇朋友嘅高蓮其實好悶好無聊，但為咗啲細路一切都冇計。報道亦引述佢哋朋友所講，高蓮要求朗尼再去康復中心戒酒，如果唔係就會選擇分開㖭。唉，好心朗尼就生性喇！
