特首林鄭月娥大前日喺禮賓府舉行新春酒會後，喺fb上載自己同多名賓客合照，包括前特首董建華及「煲呔曾」曾蔭權，唯獨無另一名前特首梁振英；雖然事後有人放風話689有去新春酒會，以示娥特唔係冇請佢，但噚日娥特同689一齊現身酒會，佢就處處同689呢個政協副主席保持距離，當中有乜原因怕且唔使解釋。
早689兩分鐘離場
娥特噚日現身八和會館新春團拜活動時，再同689狹路相逢，當娥特走近台前，689即時主動向娥特伸出右手，但娥特見689咁熱情，只係遠距離伸手同689掂咗吓手，就喺689身後閃過，同其他賓客傾偈。
到娥特同689上台坐低，兩人中間坐住八和會館主席汪阿姐，後來汪阿姐起身致辭，兩人完全零阻隔，但娥特全程冇同689傾一句嘢或打招呼，只同另一邊嘅中聯辦副主任楊健咬耳仔。儀式結束後，娥特更早689兩分鐘離場，唔知係咪唔想同689同𨋢離開？但從娥特身體語言睇，娥特明顯唔想畀人覺得佢同689呢個國家領導人行得太埋，最好記者連合照都影唔到！
汪阿姐致辭時則不忘向政府「吐苦水」，話現時八和會館缺乏發展硬件，期望政府能夠提供場地發展需要，令八和可以喺培訓新血作出更長遠同完善安排喎。
李八方