扮單身狗？ 鄺神好，忙，啊！
今日情人節，街裏愛人一對對嘅日子，唔知大家有乜放閃大計呢？數數立法會議員，單身嘅都唔係剩好多，其中一名鑽石王老五鄺俊宇，外界有傳佢其實蜜運中，八方問過佢到底係真單身狗定扮單身狗，佢竟然同八方講：「我唔答。」仲話情人節會喺工作中度過，好，忙，啊！咁寫開愛情專欄嘅鄺神又有冇好橋教吓天下有情人？鄺神竟然都唔肯講，係咪唔想俾人抄橋，破壞佢今日哄傳聞女友嘅浪漫之旅？
區諾軒食外賣 反消費主義
至於已成家立室嘅區諾軒，舊年得到太太力撐參與補選仲成功晉身立法會，就任差不多一年，今日都唔例外埋首工作，但區軒話同太太一致同意唔會順從消費主義，情人節呢啲商業化節日唔會畀機會生意佬鑿佢兩公婆一筆，今晚都係返屋企食外賣，但轉個頭區軒話因為太太支持，佢先可以兼顧家庭同議會工作，所以買咗束太太喜歡嘅紫陽花哄對方，反資本主義定哄老婆緊要，大家明啦！
機師豪掛住另一個女人？
至於以前做機師嘅公民黨譚文豪話今日係冇慶祝活動，仲心思思掛住另一個女人，但大家唔好誤會，佢諗住嗰個係佐敦吳松街通宵賣花多年嘅黃婆婆，佢話前年見到藝人鄭秀文呼籲幫襯黃婆婆之後，就決定年年情人節幫襯黃婆婆，希望香港人同佢一樣支持婆婆，不過咁唔代表Jeremy唔浪漫，查實佢早幾日同太太拍拖10周年，已經一次過慶祝埋，仲好鬼浪漫重溫番初次約會嘅行程，雖然都係行街睇戲食飯，但相信太太都冧爆咗。
容海恩同娥特過節
上個月順利剖腹產女嘅新民黨容海恩迎來第一個三人行嘅情人節，但佢個情人節第一個約會唔係老公袁彌昌，亦唔係B女，而係特首林鄭月娥，皆因林太約咗新民黨午宴，所以尚未正式復工嘅恩恩豬點都要赴會。
李八方