效力過阿仙奴嘅丹麥前鋒賓特拿份人神神化化相信唔少球迷都知，不過就真係估唔到佢位女友菲爾琳（Philine Roepstorff）都同佢不惶多讓，將賓特拿個花名紋喺頸背，認真係愛得瘋狂。
賓特拿嘅模特兒女友菲爾琳一向都好鬼野性，經常喺社交網站上載自己嘅性感相，仲試過捉住「中堅賓」拍片大跳貼身舞。日前菲爾琳喺ig回答粉絲問題嗰陣就俾人問有冇紋身，菲爾琳亦都有問必答，話自己全身只有一個紋身咁大把，而個位置應該只有賓特拿先有機會經常見到，就係頸背喇。
唔後悔紋身
菲爾琳之後上載咗一張同賓特拿相擁嘅相，可以見到賓特拿撩起菲爾琳嘅頭髮之後，清楚見到菲爾琳頸背紋咗男友嘅花名「LORD」。現代人嘅感情咁兒戲話散就散，好多粉絲都擔心菲爾琳咁搞法，第時一個唔好彩同對方分手咁點算，不過菲爾琳就話一啲都唔後悔，果然係情比金堅，希望佢哋將來都繼續恩愛啦。
相信好多球迷都知道，賓特拿除咗因為效力阿仙奴嗰陣，曾經喺比賽中擋出隊友法比加斯嘅射波，幫對手護空門而有「中堅賓」呢個花名，佢另一個無論香港抑或外國都通用嘅花名就係「Lord賓」，不過大家又知唔知呢個名點嚟呢？
2015年做真正「Lord賓」
話說賓特拿因為多年嚟各種怪異行為而俾一班超級粉絲稱呼為「Lord」，賓特拿對呢個花名都非常受落。到2015年，一份丹麥小報就喺蘇格蘭買咗一平方英呎嘅地畀賓特拿，令佢獲得勳爵（Lord）名銜，成為真正嘅「Lord賓」。
賓特拿職業生涯除力阿仙奴外，亦效力過英冠伯明翰，仲去過意甲踢班霸祖雲達斯，喺17年加盟挪超勁旅洛辛堡，幫球隊連贏兩屆聯賽冠軍。而一直係丹麥國家隊前鋒人選嘅佢，上年就意外落選俄羅斯世盃決賽周名單。