【黑鏡線索】
近月科技界最轟動嘅新聞，係新聞網站BuzzFeed大裁員。問題係，科網公司大裁員周不時都有，咁點解呢單特別轟動？
大家都知，互聯網為新聞業帶嚟好大改變。第一係發行。消費者好少留意發行，我曾經短時間坐過《蘋果日報》嘅鋤報會，仲記得第一個環節，就係講發行，我當時好奇怪，發行咪就係搵人送報紙去報攤，有乜好討論？後來先明，原來中間牽涉好多人事利益，而發行好壞，係直接影響銷量，即係其實有多少marketing嘅功能。互聯網世界，就移除咗呢一塊拼圖，內容一按直送到讀者手上。
另一環係印刷，印咁大叠彩色紙要用好多錢，有咗互聯網就唔使印，慳好多。發行同印刷，有啲報館自己做埋，有啲自己做一樣外判另一樣，有啲兩樣都外判，唔同市場又有唔同嘅計算。
傳統報館要借互聯網移除印刷同發行嘅成本，係相對容易。但之後觸發其他嘅轉變，包括善用社交媒體做宣傳兼發行，投資維護網站同手機程式，同埋改變新聞流程去迎合即時「印刷」，呢幾方面加埋，係好大嘅挑戰。
出版成本障礙消失 眼球競爭者眾
有啲傳統報館轉型失敗，衰落執笠。剩返低嘅，轉型緊。道理上，最容易嘅係第三類，嗰啲建基於互聯網新聞公司，即所謂with internet assumptions。容易因為本來就乜都冇，唔會有轉變嘅困難同阻力。呢批生力軍裏面，做得最出色嘅係BuzzFeed，大家贒住佢點做同做成點。但當連佢都做唔掂，其他生力軍就諗其實有冇得做，轉緊型嘅傳統媒體就諗，就算轉到都可能得個吉！震撼可想而知。
咁下一個問題係，點解連BuzzFeed都搞唔掂？
第一係眼球競爭問題。印刷同發行係高成本，但從另一個角度睇，呢兩環本來係入場障礙，令世界各地嘅領先嘅報紙都賺得到近乎多頭壟斷嘅利潤。換句話說，互聯網之前嘅報紙市場，主要係中至大型公司嘅競爭。當高成本障礙消失，加入報業市場嘅成本大幅減少，就引嚟大量嘅競爭。去到一個極端，一個facebook普通用戶隨手分享自己隻貓嘅搞笑相，喺搶眼球嘅角度嚟睇，都係一個出版競爭者。
落廣告要有精準數據 暴露報紙弱點
第二個問題，係眼球同收入關係改變。報紙服務兩種對象，讀者之外，就係廣告商。廣告商從來唔關心讀者，冇廣告商落廣告係為咗支持讀者睇到某某報紙。廣告商唯一關心，係說服目標顧客買自己嘅產品。喺互聯網之前嘅年代，廣告商冇更好嘅方法吸引目標顧客，報紙讀者已經係最接近嘅選擇，於是報紙努力增加讀者，就等於廣告商會多落廣告。
即係話，報紙服務讀者一向冇問題，互聯網時代問題只係多咗好多對手。但報紙服務廣告商，就好一般，只不過廣告商冇得揀。但到咗互聯網時代，有Google、facebook等等做到好精準，以人為單位嘅廣告產品，報紙廣告嘅弱點暴露晒出嚟。唔係廣告印喺紙度定show喺個mon度嘅問題，而係廣告已經變成一個科技同數據問題，而當中最頂尖嘅廣告科技同數據，就落喺兩間地球最多用戶嘅科技巨擘手上。
押錯注 instant articles虎頭蛇尾
係，Google同facebook本身唔做內容，都要靠其他人提供內容，但係一邊得兩間公司Google同facebook壟斷，另一邊有近乎無限嘅競爭，廣告錢最終落入邊一邊個袋多啲，唔難估到。之前facebook好似釋出善意，推出instant articles，令一眾包括BuzzFeed嘅媒體憧憬FB會睇長線，照顧大型內容供應商嘅利益，結果FB不敵自己嘅短期交數壓力，兼且因為fake news問題決定減少畀流量媒體，instant articles虎頭蛇尾，BuzzFeed等公司押錯注。
咁做大眾新聞同內容有冇辦法生存？經此一役，各地媒體大概會更加果斷去搵其他出路。道理上，至少有兩種可能。一，喺廣告產品方面同Google同FB競爭，正面打冇得贏，惟有搵方法側面打，例如有冇可能發揮地頭蟲優勢做啲兩巨擘唔值得做嘅網上網下接駁，但係產品開發成本可以好高。二，決心唔再靠廣告錢開飯，例如靠直接收用戶錢經營，但係做最大公因數賣廣告嘅內容，同做用戶肯畀錢睇嘅內容好大分別。仲有個可能，去到某個位變成媒體靠各地政府用公帑或其他維穩資源去養住，當然呢個模式本地讀者早已經見怪不怪。
撰文：宋漢生