年初二鄉議局主席劉業強為香港求籤，籤文入面有「那知餅食不充腸」、「畫餅將來未見香」呢幾句，雖然坊間有唔同解釋，但好多人都話係暗示特首林鄭月娥力推嘅「明日大嶼」規劃，最後都係得個吉，亦都暗示娥特嘅施政根本冇辦法令市民受惠。根據車公求籤嘅「往績」，基本上都講得幾準，咁唔知娥特點睇？而娥特答案係，佢唔識睇喎！
噚日娥特開行會前見記者，就有記者問佢好多人理解車公支籤係諭示政府嘅工作未能夠令市民受惠，咁娥特自己點去理解支籤呢？娥特就話對於籤文內容佢就唔係專家，所以冇乜特別理解，對於各方對車公籤文有唔同演繹，佢個人尊重他們自己嘅演繹，佢自己就冇乜特別睇法。
有政界中人講笑話，娥特係天主教徒，車公求籤呢啲嘢佢唔識睇又好正常，但民意佢應該識睇啩，咁多人將車公籤文聯想到政府施政同「明日大嶼」規劃，即係反映呢兩件事民意睇法好負面，唔使識解車公支籤，娥特都應該快手檢討，夾硬推對佢民望施政冇好處，對香港都唔係好事。
李八方