這個豬年，車公雖然指點「求財不遂」的迷津，但打工仔橫財夢未醒，排隊買六合彩的人龍勁過喜茶，要非南亞裔缺席，一定被誤會人龍是排演唱會票的真黃牛。一億彩金，瓜落誰家？很多人注定失望，但心態上學晒劉鄉里，當獎券是靈簽，猛說自己底子好，命水強，只要聽政府話，再幫襯馬會N次，120歲唔死實會中！唔信？跟羅致光賭一鋪，睇吓邊個長命過賭王何公！何公乃係除了林鄭，每一個香港人心裏都有少少妒忌的人辦，跟英國菲臘親王同齡97歲，報道指每日住院連醫生費用，高達一百萬。
識條鐵的窮港豬心算，來世投胎做一頭金豬都未必消費得起。不過咁，江山代有超富出，強國黃君，豪買澳洲房產，豪捐巨款予當地政黨，務求入籍，拿澳洲護照方便「旅行」。卻被袋鼠國認為性格與行徑不符國民規格，入籍申請被DQ。這位富豪瞬間轉移香港，老婆二話不說買下淺水灣一幢五億的獨立屋。五億，四圍找稅單核實希望拎到政府煩膠到嘔那四千蚊的港豬，向空氣喊話：政府唔肯爭取審批權，咁新移民每個發過這位財主才有資格移居香港好冇？家庭團聚，金主優先，石田為業，鄉紳食大茶飯，餅碎益吓小企業都好嘛。這個黃老闆入主南區，打算請十個八個60歲中年捉野豬嗎？