港大民意研究計劃噚日公佈最新嘅特首同司局長民望，作為負責收緊申領長者綜援年齡嘅勞工及福利局局長羅致光民望大跌就係意料之內，但另一個唔關事又冇做錯嘢嘅局長，民望同羅致光一樣大跌，而且隨時係俾羅致光連累，因為呢名局長個名嘅發音同羅致光一樣，佢就係公務員事務局局長羅智光。
八方噚日睇港大民調結果，羅致光支持率淨值大跌21個百分點就係預計之內，但公務員事務局局長羅智光嘅支持率淨值亦大跌13個百分點，論跌幅之大，係緊跟喺羅致光之後，但實情係公務員事務局喺調查進行期間冇爆大鑊，就算派錢激嬲市民都唔可能關公務員事，唯一可能嘅解釋係羅智光同羅致光讀音一樣，部份市民聽電話調查嘅時候，搞唔清此羅智光不同彼羅致光。