噚日年初八，特首林鄭月娥喺禮賓府搞新春酒會，自然係官蓋雲集，娥特亦喺facebook發文同貼相，話佢同一眾主要官員向400多名出席嘅嘉賓拜年，又話相比起民政事務局喺會展中心舉行嘅酒會，禮賓府嘅規模細得多，有啲似親友拜年咁樣。
八方睇娥特貼咗乜嘢酒會相，除咗有北京駐港官員同駐港解放軍代表同佢合照，少不免仲有娥特嘅友好及同事，好似港鐵主席馬時亨、終審法院前首席法官李國能、行會召集人陳智思父子，但最令人留意嘅係前特首曾蔭權夫婦都有到，娥特仲同佢哋合照！除咗煲呔，當然亦唔少得當日力撐娥特上位嘅前特首董建華合照，但八方搵嚟搵去，都唔見娥特同另一前特首689梁振英嘅合照嘅？據知噚晚梁都有出席，仲有同煲呔握手，但為乜唔見佢張相？究竟娥特同689兩個有冇合照？如果有，唔知娥特之後又會唔會補返上載呢？