大編輯嘅中學同學W先生好痛錫寶貝女兒，八、九年前，W千金考DSE失手，成績不如理想，不止入唔到心儀嘅中大，連其他七大都失機，幾乎痛哭失聲。W先生知道大編輯見多識廣，向大編輯問路，大編輯話：「你個女最叻係英文，不如試吓申請入恒生管理學院（現稱恒生大學、恒大）啦！」大編輯又諮詢左丁山意見，左丁山話：「讀書有Take Two，入恒管讀英文好呀，昔年新亞英文系師兄在中大退休後，都去咗恒管，如方梓勳教授、陸潤棠教授，都係英文高手，一於叫W千金申請啦。」
入咗恒管，W千金發憤讀書，畢業成績優良，成功申請入到中文大學讀英文碩士，畢業後為求深造，又到英國老牌大學讀多一個碩士，不過係犯罪學啫！可見即使考DSE成績不如理想，還有途徑繼續求學，最重要係自己勤力。
好咯，W先生夫婦去英國參加女兒碩士畢業禮，之後一家三口到倫敦一遊；年初三返到香港，與大編輯碰頭，大呻在倫敦遇上騙徒，損失金錢，覺得自己好笨。佢地住在King's Cross附近一間酒店，晚上出外吃過晚飯之後，約九時許步行返回酒店，在酒店前一個街頭，街道昏暗，突然間有一個男士走埋嚟攔路，話係意大利遊客，問路點樣去羅素廣場，W先生夫婦唔識英文，叫W千金代答，W千金不知對方是神是鬼，話自己都係遊客，唔清楚，意大利人於是走開。一家人向前行多十幾步，突然又有兩個男人閃出嚟，拿出證件模樣，向佢地一閃，聲稱係緝毒人員，跟蹤一個疑犯意大利男人，見到佢地與該男子傾談，男子手部有動作，問係唔係「交貨」，要查佢地護照，W先生唯有打開手包畀佢地望一望，點知「緝毒人員」手快，一手就插入手包搜查，拿出八百英鎊現鈔，W千金連忙喝止，「緝毒員」將現鈔放回手包，講一聲：「冇事嘞，走啦！」三人急步返回酒店，向櫃台職員訴苦，職員話：「哎吔，遇上騙徒咯，快啲檢查有無損失。」W先生心諗應該冇吖，明明見到男人將現鈔放回手包㗎，太太叫佢再check清楚，打開手包再望，哎吔吔，只剩番100鎊，唔見咗七百。職員嘆息：「快啲報警，但呢類騙案我地見得太多，好難搵番啲錢。」於是報警，警員話：「一年以來，同類騙案發生咗幾百單，未破案，你地自己要小心啲！」W先生大嘆倒霉，憑報案紙申領保險賠償，獲賠200鎊，淨損失500鎊，W先生話：「或者破財擋災，新春頭就遇賊，希望以後豬年順境！」W千金呢？讀犯罪學碩士完畢，即刻遇上了活生生一課犯罪個案！