車公年年做KOL，今年手車特別辣，對車大炮的大話精唔再俾面。心有屎的，睇完支86中簽，個心離一離，吐槽如下：
777黑面推開靠過來取暖的老公，咆哮：「幫我起車公個底！我估佢屬馬，馬殺雞，俾佢剋住，屬雞的我實降班變鵪鶉。車公泊邊個碼頭？唔該感召吓。」
茂餅波如坐白車，面青口震表白：「我做大那個餅係大餅，五蚊十蚊嗰隻，唔係一蚊雞，冇一元復始那個一元咁奀，俾我做特首派錢肯定唔止四千咁孤寒。車公2022照住我啦，俾你照埋個肺和條腸都得。」
自稱以娥傳娥的羅中年澄清：「我冇叫超過120歲的車公搵工，係佢自發，年年初二無休，你睇佢幾有自信呢。求財不遂咪就係影射60至64歲老餅囉。」
港鐵和×頓即刻跟車公上契：「消失的紀錄全部化成簽文啦，叫劉鄉里誠心啲跪拜，有求必應，車見車載！車公揸嗰架唔係坦克，唔係列車，港豬放心，唔怕變肉餅！」