噚日係人日，即係人人都生日，而民主黨中委就揀呢個好日同傳媒拜年，主席胡志偉、副主席尹兆堅同羅健熙仲特登向特區高官炮製三道菜祝壽。羅健熙煮咗味「紅椒司炒魷」，一睇就知最啱律政司長鄭若驊品嚐，呢味餸賣點係有好多椒絲墊底，加埋炒魷魚，寓意明顯。
手字唔錯嘅羅健熙仲賣大包，揮筆寫咗「僭建枉法鄭若驊 早日歸去救香港」嘅揮春送畀鄭若驊。尹兆堅同胡志偉分別炮製「老人家都敢蝦」同「長者年齡唔好推糕」畀政府，餸如其名主要諷刺香港政府坐擁萬億庫房但就不斷蝦老人家。
唯一現身嘅中委女將，係喺觀塘做緊地區工作嘅梁翊婷，佢話啱啱過咗一個前所未有咁忙嘅新年，笑言最慘係瞓得少，而唔少街坊送上新年美食，亦令佢意外肥咗五磅喎。