喺現今嘅香港，唔少年輕人中學已開始拍拖，更加唔使講大專生、大學生，但竟然仲有大專院校禁止校內舉辦情人節活動，話有鼓吹同學談戀愛嘅意思，真係令八方有重回上世紀六七十年代嘅感覺。
話說「明愛專上學院及明愛白英奇專業學校聯合學生會」早前喺facebook公佈，原擬喺後日（14日）情人節之前，舉辦名為「明愛邱比特」系列活動，包括「匿名配對」，成功配對嘅學生可以玩「定情信物」，「定情信物」其實亦只係去學生會攝影站，同成功配對嘅同學影張相。
網民︰降格做幼稚園算啦
其實成個活動睇來睇去都冇乜出位犯禁之處，但噚日學生會引述校方話，「邱比特」三字同「匿名配對」有鼓吹同學談戀愛意思，俾校外教友知道「會向學校投訴，影響學校聲譽」，所以學生事務處唔批，要取消活動。
呢單嘢爆出後，好多網民不滿校方咁專制，有網民更嘲笑不如「降格做幼稚園算啦」。校方回應就話，學生會至今尚未就有關活動完成提交申請。據了解，學生會冇向學生事務處提供完備的活動內容和足夠的資料，亦未就有關活動填寫同遞交申請表，所以學生事務處無法按既定程序作出跟進喎。
李八方