鄉議局噚日搞新春團拜,特首林鄭同成班官畀足面到場,不過身為鄉議局主席劉業強致辭嘅時候,就處處語帶相關,畀說話娥特聽,一時又講針對原居民丁權嘅司法覆核,一時又話對特區政府某啲施政缺失有怨言同不滿,但又話唔會因為呢啲事影響鄉議局做港府嘅堅強後盾!
劉業強致辭先講世界大勢,簡單就係西方針對中國,但祖國強大唔怕佢哋!之後佢就講番香港,話有一小撮人決意同新界人抬槓,挑戰《基本法》賦予原居民嘅合法權益,不過佢話無論案件結果如何,都唔會動搖新界人愛國愛港愛鄉嘅信念同對國家嘅忠誠。之後佢仲話雖然對特區政府某啲施政缺失有怨言、不滿同不同意嘅地方,但會懷住求同存異嘅態度,仲保證喺佢劉業強治下嘅鄉議局,必然係娥特班子嘅堅強後盾同信賴嘅朋友,唔知係咪暗示娥特唔好得失鄉議局呢個「後盾」呢?