朗尼又有衰嘢！跟隨華盛隊聯隊去咗美國佛羅里達州集訓嘅朗尼，上周被拍到喺酒吧喪飲10粒鐘，仲被發現同酒吧女郎露絲基（Vicki Rosiek）（小圖）喺車廂密會再飲，到凌晨兩點半先閃，疑似再次背住老婆高蓮偷食。33歲嘅朗尼上年12月先因為喺公眾場合醉酒行為失控喺華盛頓機場被捕，估唔到唔夠幾個月又出事。
朗尼上周日喺當地時間下晝去咗Pier House 60酒吧一邊睇超級碗一邊隊酒，至八點轉場同隊友再劈。直到隊友喺11點幾走人，朗尼就搵嚟早幾日先識嘅吧女露絲基再飲，據指女伴仲請佢再轉場，兩個仲一齊坐女方嘅車離開，之後再喺車度獨處到凌晨兩點半。據指，曾經背住老婆高蓮召妓嘅朗尼早前已被警告：「高蓮警告過佢，要檢點吓自己嘅行為。以佢嘅前科，同女性喺車上密會簡直係玩火。」