自從社交媒體大行其道後，賣廣告唔再局限以前製作一段30秒或者一分鐘嘅電視廣告，玩法層出不窮。搵過唔少球星拍廣告嘅「藍色汽水」今次又有新搞作，而且仲上演一場美斯鬥「美斯」㖭！講緊嘅係最近利物浦球星，有「埃及美斯」之稱嘅穆罕默德沙拿喺ig放嗰條片，題目叫「Behind the scenes」，似乎係拍緊「藍色汽水」新廣告。片入面見到沙拿首先高難度射波穿過車胎窿，之後將汽水罐擺上車胎，然後轉身「窩利」踢走個罐，射術一流。之後真．美斯亦喺ig放段片，佢仲高難度，除咗射個波入個窿，仲放枝汽水喺個波上面。結果，梗係難唔到阿根廷球王美斯，個波成功入窿外，枝汽水仲完美企直落地。