與獎無緣的人生失敗者，前幾天讀到電台獎座淪落路邊雜貨攤的新聞，第一個反應是老氣橫秋的「啲後生真係唔惜福」，但話口未完，體內潛伏的綠色環保義士馬上現形，以鼎力支持家居簡約為己任，冷冰冰講出心底嗰句：既然塵歸塵土歸土，垃圾歸垃圾非常應份啊，雞肋就話食之無味棄之可惜啫，鼓勵式的獎項，永遠銘記心中就夠了，擺在住所角落惹塵埃，倒不如扔出視線範圍以外乾淨。吃不到的葡萄是酸的，自己冇就唔抵得人哋有……咦，咪住……那年達明一派《石頭記》榮獲十大中文金曲最受歡迎演出獎，有一天在街上遇到陳少琪，他熱情通告「個獎你都有份㗎，得閒上去寶麗金辦公室望吓吖」，語氣似足「個仔你都有份㗎，唔湊都畀家用吖」，一失足成千古恨之感頓生，令人莞爾。所以，對唔住，一落筆唔覺意講咗大話㖭。
這單新聞有十分歡樂的亮點，其中一位疑似垃圾蟲，站出來為自己的清白分辯：「就算我真係有扔個獎，都一定唔會出現喺港島區，我住九龍。」哇咔咔咔，時光即刻倒流，回到港九海底隧道尚未動工的年代，夜歸人錯過了尾班渡輪，必須靠一種叫「嘩啦嘩啦」的交通工具才能過海。生性樂觀真好，笑穴隨時隨地一點即中，譬如前央視名嘴崔先生又試爆大鑊，指內地某警司公器私用斂財數以千萬計，跟進報導說當事人「白天以工作為由，與邵××在香港碰面，晚上喝酒去廟街找小姐尋歡」，我當堂笑到瀨尿兼夾仆街。大陸豪客，居然去廟街買春？你不如話，陸版買嘢精黃偉文蒞臨香港，拖喼去旺角女人街掃貨。