巴西名宿朗拿度上年入股西甲球會華拉度列，收購咗51%股份成為大股東。「大哨」早排受訪就話，自己曾經有意入股意甲球會，有傳媒即時聯想佢所指嘅係上年遭遇擁有權變動嘅AC米蘭，不過最近大哨就澄清從來冇咁嘅打算。朗拿度接受意大利《天空體育》訪問，話曾經研究過投資意大利、英格蘭同葡萄牙球隊，不過最後揀咗華拉度列，「因為要保密，我唔可以話你知我曾經同過咩意大利球會傾，不過我從來冇搵過米蘭。」另外，大哨亦澄清所有投資都係個人嘅，冇財團喺背後支持，「呢啲都係我個人嘅投資，好多人話我背後有金主，或者係幫中國人出面投資，不過都係吹水嘅。」