車公撻着，不再神隱，車神靈籤，做晒頭條。車公點化，塞錢入港豬個袋，但明顯地有人拖車公後波，當香港人是唔識交通規則的豬八戒。這批高人以葉劉為樣辦，豬心算轉移視線，猛話政府大把錢，「近一個月有五百幾億累計盈餘」。咪係，咁為乜關愛共享派四千蚊要咁麻市民膠煩！葉劉話中有骨，借牛刀殺林鄭隻雞，港豬心領咯。上次麒麟撞飛冇令葉劉撞壞腦，今次呢個係車公，馬力與野豬一樣，精叻的葉劉想行埋西環王公但冇碇企，決定使橫手以車公借力劏雞。
86號中簽講到明，話梅止渴，畫餅充飢，等同幣少撒錢，執到都要嘔返出來。明日大嶼，明益地產霸權，石田就是石屎森林，林鄭空下承諾，2032年後入住明日大嶼那110萬居民，只是林鄭充場面而永遠不須要找數的佈景板，將大嶼拉向大灣區，毀掉香港獨門獨戶的長期優勢，石田隨時搬龍門，石屎樓奴的共業，是盲撐政府做大個餅，結果，做了被割那條盲腸！餅碎都執唔到！