費托旋風隨住鳥棲砂岩噚日離港，總算暫告一段落。不過，一直相當nice嘅費蘭度托利斯，噚日朝早喺機場嬲到一個名都唔肯幫fans簽，仲有少少黑面㖭，唔通係輸波嬲嬲豬？非也非也，係因為有人貪得無厭囉！
「我已經幫你簽咗喇」
是咁的，今次賀歲盃，要數最大名氣亦最多fans嘅球星，唔使問阿貴都知係費托。難得呢位西班牙金童咁親民，上星期日嚟到香港嗰陣，喺接機大堂簽名簽足20分鐘先走，但其實嗰陣費托已經被激親！事關有啲球迷都幾貪心，費托已經幫佢簽完名，然後佢哋轉個身又攞第二啲嘢嚟畀佢簽，真係想簽到人哋手都軟埋為止，見慣世面嘅費托當時已經同某啲人講過：「我已經幫你簽咗喇。」嗰刻應該已經畀人搞到嬲嬲哋，更嬲嘅應該係同場其他嘅球迷，因為有人搞寸咗個party，令到佢哋攞唔到簽名。
費托喺香港嗰幾日，依然係維持好nice嘅舉動，雖然唔係次次都滿足到球迷，但我求大俠大膽估計，「王子」應該喺嗰幾日都簽咗幾百個名，分分鐘攰過踢場波，但竟然有人過份到去埋球隊住嘅酒店之餘，仲上埋去客房嗰層，搞到要酒店職員趕，而且驚動到警察先收到科。
女球迷叫YNWA都唔理
呢幾日搞咁多嘢，睇嚟費托都躁躁地。噚日朝鳥棲砂岩拉大隊返日本，都有大約二十位球迷一早去到機場送機，亦盡最後努力去攞偶像簽名啦。點知一班球迷靜靜哋咁等球隊寄完行李後，費托一行出嚟就同啲球迷講：「我已經幫你哋簽晒名喇。」
我求大俠認得出，真係有啲連日嚟都有出現；而且比較「進取」嘅球迷喺度，但有冇啲無辜嘅因為咁而攞唔到簽名就不得而知喇，如果有嘅話，真係畀啲貪心嘅人連累呀！最後費托全程冇乜表情，孖住西班牙同鄉昆卡盧比斯慢慢走到離境禁區，就算入閘前有女球迷大聲同佢講咗句「You'll never walk alone」，佢都完全冇回應呀！