球壇又傳出不幸消息！葡萄牙球星基斯坦奴朗拿度（C朗）嘅媽媽證實乳癌復發，未來嘅人生要繼續對抗癌魔。C朗媽媽Dolores喺2007年曾經確診患上乳癌，做手術移除咗腫瘤同接受治療之後好番。不過佢最近接受葡萄牙一間電視台訪問，證實癌病復發：「我喺馬德里做咗另一個乳房手術同放射性治療，𠵱家為生命戰鬥緊。」雖然要再次抗癌，但64歲嘅佢仍不忘喺節目度關心C朗捲入嗰單涉姦案，指佢好清楚C朗嘅為人，所以相信佢個仔唔會做呢啲事。喺受訪前，佢已經飛過去意大利同效力緊祖雲達斯嘅C朗慶祝生日，相信後者都已經知道媽媽嘅病情。C朗一向好錫佢媽媽，以前當母親確診患癌嗰陣，佢曾經捐錢畀葡萄牙當地嘅抗癌基金，等佢媽媽可以得到更好嘅治療。