利物浦連和兩場之後，仲將英超榜首位置交到踢多一場嘅曼城手上。對於紅軍近期嘅表現，名宿艾德列治直接炮轟拉爾拉拿同拿比基達，直指佢哋冇資格為紅軍上陣。由於佐敦軒達臣同韋拿杜姆受傷，紅軍作客韋斯咸嗰場就要拿比基達同拉爾拉拿擔正，不過表現就認真一般，紅軍最終失分。艾德列治就話佢哋係罪魁禍首：「球隊贏唔到韋斯咸，好大程度係因為中場冇表現。拿比基達同拉爾拉拿再次證明佢哋冇能力為爭冠球隊效力。」艾德列治仲話：「我第一眼睇拉爾拉拿已經唔覺佢好好，但佢曾經證明過我睇錯。不過受傷之後到𠵱家，佢表現都仲好掙扎。」佢又指基達仲要時間適應球隊：「至於基達，佢仲未適應紅軍嘅生活，交唔出我們要嘅表現，即管睇吓佢融唔融入到隊波喇。」