前韋斯咸後衞、曾經46次代表捷克國家隊嘅列卡,禮拜四因為涉嫌詐騙被布拉格法院判監15個月。呢位45歲悍將被控以借番嚟嘅名貴房車用嚟賣,簽晒約收晒錢之後就唔能夠將架車轉到一位女性賣家名下,結果當庭被判有罪同判監15個月,今次亦係列卡掛靴後第二次坐監。列卡涉嫌詐騙,不過呢個判決唔一定係最後判決,因為宣判後列卡嘅代表律師同檢控方同樣好不滿,即刻提出上訴。列卡上年八月就已經因為報復前妻Vlad'ka Erbova,將佢個名放上色情網站賣廣告搵客,結果被判監六個月,但之後改判社會服務令,以前亦試過兩次因醉駕而被罰停牌。球員時代嘅列卡就已經出晒名係茅柴,2001年以破當時球會紀錄嘅550萬鎊,由費倫天拿轉投韋斯咸。