雖然我求大俠唔識算命，但如果問英超Big 6邊隊睇落最有朝氣，我就點都揀自從蘇斯克查上任、成隊轉晒運嘅曼聯喇，最近仲聽講有位舊隊友可能返嚟輔助蘇B，講嘅就係有「奧脫福大帝」之稱嘅簡東拿。
呢位前紅魔七號最近喺社交媒體ig，突然發佈一張企喺舞台上背對鏡頭嘅霸氣相，仲喺張相嘅caption賣關子咁講：「我唔可以話你聽有咩事，但你將會愛上佢。」好多人喺張帖下面留言，話簡大帝係預告重返「夢劇院」，出任屆時新設嘅體育總監職位。
傳做曼聯體育總監
報道話曼聯自辭退摩連奴後，一直有意參考其他歐陸球會，設立體育總監一職，唔少前曼聯名將好似門神舒米高同現任阿積士CEO雲達沙，都盛傳係曼聯招手目標。不過，簡東拿家陣發佈呢張耐人尋味嘅相，唔少博彩公司隨即調低佢出任曼聯體育總監嘅賠率，到底佢會唔會重返「夢劇院」？我求大俠都好想知，即刻走去揭幾本運程書，望吓1966年出世嘅簡大帝，豬年運程如何，結果大致都話屬馬嘅朋友，今年會有晉升或轉職嘅機會，而1966年出世嘅人，更加會容易搵到工作，但就要留意唔好同屬鼠及屬牛嘅合作，否則會有風險，而紅魔領隊蘇斯克查正正屬牛，即係如果簡大帝返去，唔知會唔會同呢位前隊友因公事出現拗撬呢？
西甲雙雄吼實福仔
我求大俠當然都唔想紅魔下季再有咩混亂，因為要勸班球員續約都唔係易，最近就傳拉舒福特俾西甲雙雄硬撬，其中巴塞隆拿仲有名宿古華特出到聲，直指福仔好啱巴塞踢法，直情開聲話佢就係蘇亞雷斯需要嘅進攻拍檔，紅魔聽到仲唔嗱嗱臨出高薪同福仔續約？我就照睇運程書，發現福仔同蘇B一樣都係屬牛，但就冇話佢哋好易轉職，只係話事業會創出一番成就。
至於年三十嗰日去俄羅斯主持冰曲開球禮、喺冰場意外跣到攤攤腰嘅紅魔前領隊摩連奴，之前都話豬年一定會教番波，好大機會係今夏，而爆出佢首選就係吃回頭草，再次挑戰意甲重掌國際米蘭。運程書亦有話1963年出世屬兔嘅佢，去遠啲地方工作會比較好，即係離開佢𠵱家住嘅倫敦或英格蘭，可能會仲有作為。