豬年未到，豬瘟先頭部隊早已南下，因為唔係車見車載的小肥豬，唔夠卡通，年輕人採取漠視政策，繼續灌輸白白豬幾咁卡嘩伊。年宵花市所見，中學和大學生組檔的販賣豬，清一色超可愛，嬲嬲豬喲，總之無提內地那場豬瘟，新年流流，講嗰啲，太戇九。
這場發乎內地的豬瘟，非常離地，叫做非洲豬瘟。觀乎日本腦炎、中東呼吸綜合症，都被強烈「冠名」，領正牌是「外國貨」，跟強國劃清界線。香港本地豬，本地養本地劏，但眾志那隻港豬tote bag，因為內地訂製，無可避免，連印製的門都摸唔到，被DQ門外，也許值得安慰，起碼眾志這頭港豬，不會被內地非洲豬瘟污染，得保港豬清白之軀。
眾志設計那頭豬，騷胸扭腰，豬奶頭盡現，的確非一般。日本朋友每年寄給我們自畫的賀卡，他筆下的，是生龍活虎、有獠牙的野豬。香港仍有野豬出行，大圍街坊還替野豬取名字，有一頭叫做麻子。我們的日本朋友聽到一定大樂。野豬的天敵嗎？肯定是「唔係過到人日，就代表佢係人」那些X街。