英超榜首利物浦又失分！年三十晚紅軍作客「槌仔」韋斯咸，喺先開紀錄之下俾對手逼和1:1，賽後只係領先第2嘅曼城3分，領隊高路普都咪話唔頭痕！
紅軍上輪又係領先之下俾李斯特城逼和，呢個劇本又喺今場重演。紅軍今場變陣出擊，占士米拿客串右閘，法賓奴泰華利斯同拉爾拉拿亦正選上陣。上場紅軍靠沙迪奧文尼先開紀錄，今場都一樣，喺22分鐘佢接應越位嘅米拿傳中轉身抽入，不過旁證冇舉旗，入球有效。
高帥：後衞冇態一分合理
正所謂「冤枉來瘟疫去」，紅軍嘅領先優勢只係維持咗六分鐘，槌仔由菲臘安達臣開出自由球，米查利安東尼奧衝入禁區接應，輕鬆射遠柱入網追成1:1平手。換邊之後紅軍雖然主動搶攻，不過始終都攻唔破槌仔嘅大門，最終1:1和波收場。紅軍賽後只係領先曼城三分，假如曼城周三擊敗愛華頓嘅話，就可以靠得失球差壓過踢少場嘅紅軍上榜首。
紅軍領隊高路普賽後都承認文尼嘅入波係越位在先，但係就話和波結果合理：「我哋嘅入波明顯係越位，可能球證喺半場休息嗰陣已經發現，只能講拎到一分係合理賽果。」
工程師：佢成日靠越位
高路普又話，球隊家陣好多球員都有傷病，所以表現受影響：「我肯定我哋嘅表現可以比今場更好，不過米拿因為病咗星期一冇練波，可能佢家陣仲未好番。至於華基爾雲迪積克亦都缺操咗四日，今場我哋兩個後防主力都冇態，所以陷於苦戰。」
雖然高路普就話今場一分合理，不過槌仔領隊比歷連尼就唔係咁睇，佢仲話高路普已經唔係第一次靠越位波搵食：「高路普慣咗以越位波取勝，佢之前教多蒙特嗰陣都試過咁樣擊敗我教嘅馬拉加。」估唔到「工程師」咁好記性，唔怪得完場佢同高路普握手嗰陣舉起兩隻手指啦！