一班魯能球迷（圖）遠道由山東搭飛機嚟大球場，佢哋帶住巨型banner，又唱又拍手，令現場增添氣氛，其中一位女球迷就話今次魯能只嚟咗十幾人，係因為山東人好注重農曆新年，初一到初五都唔會離開家鄉，今次佢哋就破例一次。
花絮：狠飛淳淳
棒球影星胡子彤（圖）為咗費托唔理女友歐鎧淳，跟埋班波友入場睇波，子彤話：「一來Step唔睇波，我哋又成班男人，得佢一個女仔會悶親。」雖然子彤係曼聯迷，但佢話好大原因係因為費托先入場：「佢畢竟係西班牙傳奇，神級射手要嚟支持。」
花絮：孖Day最好
賀歲盃都算係港人集體回憶，一向搞開兩日，即係年初一同年初四，近年因贊助問題變到得番一日，今年又玩番兩日，唔少球迷都讚好，好似過去10年都有睇賀歲盃嘅鄺先生（圖），都話鍾意2日踢4場，新年有多啲波睇係好事，而且票價180同280蚊都好合理，以孖day形式買都唔錯。
花絮：吉祥食店
人總希望係農曆新年聽啲吉祥說話，大球場有間食肆就將啲食物配個吉祥名（圖），好似魚肉燒賣就係「年年有魚」、熱狗就「長長狗久」、脆炸雞寶就「金銀滿屋」、花生就「花開富貴」，最有心思係幾款飲品都有個貼切吉祥名，清水係「順風順水」、啤酒係「送走舊愁」、汽水係「喜氣洋洋」。
