唔好以為行上紅地氈就大吉大利，一個人行衰運，就算行紅地氈都會跣腳，就好似前曼聯領隊摩連奴咁。摩佬自從俾曼聯炒咗後，無工一身輕，上月仲俾beIN Sports邀請做客席球賽評述，但唔知係咪「輕得滯」，星期一佢幫一場冰上曲棍球賽主持開球禮嗰陣，竟然唔小心跣親。
摩佬獲邀做特別嘉賓，主辦單位梗係識做，特登喺冰場上面鋪咗條紅地氈，等佢可以主持開球禮；或者平時行慣草地嘅佢，對冰場實喺太陌生，當佢開完波準備沿紅地氈離開時突然跣腳，結果成個人跌咗喺地，要場上球員暫停比賽扶佢起身。另外摩佬喺教皇馬嗰陣逃稅，俾馬德里政府起訴，最終佢同意一年監禁嘅處罰，不過摩佬唔使真係坐監，只要交大約218萬歐元（約2,000萬港元）嘅罰款就可以了事喇！
