恭喜發財，今日係己亥豬年大年初一危日，據蔡伯勵先生之通勝所寫，早上出門拜年宜選午時（11至1），再早的就係辰時（7至9）。巳時（9至11）、未時（1至3）及申時（3至5）為凶時，不宜出門，如果信到十足嘅話，今朝出門向長輩拜年，要早啲出動咯，但有時未必可以依足計劃行事嘅，出門講聲「百無禁忌」啦！
跟足農曆嘅話，豬年以立春之時開始，即昨天2月4日上午11時14分，立春八字係己亥年丙寅月壬申日丙午時，係破日（亥年申日，申亥相害），唔係幾盞，八字內有2水3火1木1金1土，五行齊全，屬陽壬水命，以此測豬年運程，梗係要請教八卦邱。佢話正月壬水，雖有汪洋之緣，但春天木旺，木旺即表示生木之水被洩，氣值休囚，宜有庚金（金生水）培育，水源方可源源不絕。八字之中，有無庚金呢？有啲啦，地支申屬金，內藏庚壬戊，叫做可以支援吓，但力度冇庚金在天干咁有力。此外，壬水乃江湖之水，如果任由壬水四散衝擊，會造成水患，故此最好有堤規範之。堤即厚土，戊土也，立春八字無戊陽土出天干，只有己陰土，己土乃地上泥土，與壬水混合，變成泥漿，防水不成，反而將水搞得混濁，如果講人，就係未必高雅，傾向凡俗。第三，壬水不畏火，最好有陽丙火（太陽之火）映照，壬水可得溫暖，晶瑩清澈。八字內有無丙呢？有呀！丙火透干兼藏於地支寅（內藏甲丙戊），正是陽光充沛，故此春天壬水最需要之三大要素並不缺乏，立春八字叫做唔錯嘅嘞，如果有嬰兒在此年月日時出生，算命先生大概會批命：「富而不貴」，應該一生生活不錯，鍾意賭波賭馬之類，做不成特首。不過依家邊度有人恨做高官吖，搵到錢夠多夠長，賭波賭馬唔使憂，快活過神仙咯！
以立春八字測香港前景又點呢？八卦邱話係大題目，一般指香港八字係1997年7月1日午夜12時，喜水忌火，豬年就係水年，正啦，故此預計今年香港市面多啲水，比較平靜，氣氛融洽一啲，只是水年（豬屬水）遇到水命（壬申日），要慎防水災，可能全年多雨，屬水行業股票應有得益，水旺則木生，屬木行業都唔錯。講八字，當然係中國舊學，論方向以中國為中心點，內地在香港之北方屬水。美加在中國之東，屬木。中美都唔錯。中美貿易談判或者有驚無險，經一番轉折，最後能達成協議。