日本喺上周五亞洲盃決賽1:3輸咗畀卡塔爾，雖然輸波但都唔失禮，一如以往佢哋自發清理更衣室，仲用日文、英文、阿拉伯文三語寫低感謝主辦國阿聯酋工作人員嘅字句（圖），球隊嘅公德心同自律，繼舊年世盃之後，再次令大會要喺網上分享：「日本將更衣室打理得一塵不染，仲留低英文、阿拉伯文及日文嘅多謝字句！」舊年世盃日本喺16強被比利時絕殺出局，但球員將更衣室打掃乾淨，同埋留低三隻藍色紙鶴，以及俄文嘅「多謝」字條，令國際足協人員非常感動。而亞盃四強俾日本踢出局嘅伊朗，前鋒阿斯蒙就以1,200萬歐元（約1.1億港元）由俄超嘅魯賓卡山去咗辛尼特，簽約三年半。