內地來港旅客在2018年增加至五千萬人次，冇佢哋就冇生意，有佢哋就令香港更擠迫，香港回歸二十年，最大之經濟問題係特區政府冇全盤擴大香港面積（即填海），增加土地供應（包括重新規劃郊野公園及綠化地帶佔本港總面積比例），而只係頭痛醫頭，腳痛醫腳，碰上香港人基於保護本身權益，既得利益或保護環境，鍾意與政府打官司，阻延收地收樓、重建進度緩慢，於是本港出現「供應面」問題，土地缺乏，住屋缺乏，醫院缺乏，酒店缺乏，甚至殮房停屍格都話唔夠，真正係死都唔得閒，屍體被搬來搬去。
旅遊發展局公佈2018年數字，本港酒店房間有八萬幾，入住率高達九成以上，尖峰時達到九成五、九成六，在酒店業來講，已經係接近滿到瀉嘅紀錄，照計酒店生意大有可為。點知啟德機場跑道近郵輪碼頭旁邊有一幅臨海用地招標，竟然流標，九個財團入標價都未及政府底價，於是土地收回，擇日再投。點解會咁樣？業界話係郵輪碼頭唔夠生意，人流少，但係同區有幾幅住宅用地已經賣出，落成後會有好多人入住，人流已經不少啦！香港人鍾意到酒店飲茶食自助餐，區內酒店嘅餐廳生意一定不愁，遊客有咁多，點會缺客啫，所以啟德酒店用地流標原因不明，應該就係地產財團睇前景唔係咁好，同時政府奉行高地價政策，地皮底價定得太高之故，但將來實會有人買嘅。左丁山想講嘅係，主要建設如此這般因種種不同原因延遲三幾年，香港發展步伐追唔上實際需要，結果就係成本與價格齊齊高漲，苦了最終消費者。
蘋果動新聞（1月30日）報道特區政府有意叫旅發局推廣南區，繼「中環新城」及「深水埗新舊交融」之外，成為第三個旅遊主題，赤柱居民老友記，特別係外國人住客對此就怕怕咯。南區由石澳至貝沙灣係長方形地段，想由頭行到尾，相當辛苦，坐車又會造成淺水灣一帶交通擠塞，行香港仔鴨脷洲，又好似單調一啲，政府嘅師爺點解唔推廣油麻地及連接西九文娛區呢？呢個地區既有果欄古蹟，又有油麻地戲院，廟街係歐美遊客鍾意嘅，兩年後更有博物館加戲曲中心，晚上節目多，已是中西交融，本土古老文化與現代西方藝術結合之地，並且行路容易，地鐵方便。旅發局推廣油尖西九畀外國自由行遊客，容易過發展南區多多聲，旅發局班人比較貼地，唔該佢向政府多多表達好意見。