今日年三十，相信好多市民準備過新年，而一班駐香港嘅外國領事館，亦紛紛喺fb上載農曆年賀年片，而且仲越玩越貼地，除咗例牌會講廣東話之外，仲落埋區視察民情，唔單止比京官淨識用普通話講兩句祝賀香港人新年快樂認真，隨時比娥特條拜年片仲有睇頭。
法國︰拿破崙庇佑港人
好似法國駐港澳總領事官明遠喺領事館fb用廣東話拍片，向港人拜早年，今年係佢第一次喺香港過農曆新年，條片入面佢仲話要辦年貨，喺中上環一帶遊逛，仲誤以為貼喺門口嘅關公像係揮春，有個華裔女士即時提點佢，佢就同對方講，法國都有一個做咗皇帝嘅大將軍拿破崙，兩人之後又各自搵到拿破崙同關公騎馬畫像互贈對方。官明遠希望今年多了解中國傳統文化，同時向港人介紹法國重要歷史人物，仲話希望拿破崙同關公庇佑港人。
英國 真係恭喜你呀
英國駐港總領事館就喺fb上載副領事柏德謙去中環石板街嘅短片，又係全程講廣東話，而今年又係佢喺香港過嘅第一個農曆新年，所以亦入鄉隨俗，特登去石板街買利是封同新年裝飾迎豬年，仲hashtag咗新春連環恭喜你。
加拿大 楓葉國豬肉賀年
加拿大駐港澳總領事館fb豬年賀詞片段就大賣廣告；總領事南傑瑞在片中除大講廣東話，亦化身廚師，以加拿大出產嘅豬肉同食品，為館內同事炮製大餐，又祝港人豬年豬籠入水。
德國 拜年都抽水？
德國駐港總領事館喺fb上載照片，總領事林文禮亦拍咗拜年片，好快會上載，照片見到林文禮又係落區體察民情，又攬住豬公仔拍片，德國駐港總領事館fb以強力抽水見稱，好多網民估林文禮條片會唔會又抽水？
美國 土豬論扎根香港史
近幾年都有拍片向港人拜年嘅美國駐港澳總領事館，今年就由總領事唐偉康同太太做主角，全程以廣東話對答，唐偉康喺短片問太太對上一次「土豬」年係邊一年，佢太太就翻查身後錄影帶箱，箱入面除有多盒寫上美國領事館生肖年記趣外，仲有寫上「電視劇 大時代」、「李小龍 唐山大兄」同「綜藝節目 歡樂今宵」嘅影帶，之後佢太太播有關嘅片，顯示過去兩個「土豬」年係1899和1959年，反映領事館在港已有百多年歷史，之後佢兩夫婦仲用廣東話同港人拜年。
八方初一至初三收爐，初四啟市，喺度祝大家豬事大吉。
李八方