曾經喺西甲鬥餐死嘅兩大球王美斯同基斯坦奴朗拿度（C朗），上周六比賽都好風騷咁入兩球，但隊波就唔係幾爭氣，一齊和波收場。美斯效力嘅巴塞隆拿，主場同華倫西亞打和2:2，至於已經轉戰意甲嘅C朗，佢隊祖雲達斯就主場俾帕爾馬逼和3:3，而且客軍前鋒謝雲奴似乎仲搶鏡過佢，個人喺比賽尾段連入兩球先扳平，仲要其中一腳係用後腳射入，認真威水。
先講美斯，佢上周六帶領嘅巴塞竟然喺魯營先失兩球，俾華倫嘅加美路同柏利祖射入落後，要去到39分鐘先由美斯主射12碼追近比數完上半場。換邊後64分鐘，呢位王牌球星接應維達爾傳送再建一功，先至幫巴塞攞番一分。不過，佢喺比賽中途曾俾對手撞跌，要軍醫入場治理，之後先可以繼續比賽，但外界都擔心美斯大髀受輕傷，禮拜三西盃鬥皇家馬德里上陣成疑。
巴塞祖記齊齊和波
至於今年冇得同美斯喺西盃對決嘅C朗，就喺意甲同美斯一樣入兩球，而且仲有一球助攻畀隊友魯加尼，幫祖記66分鐘時領先帕爾馬3:1，但帕爾馬之後就有謝雲奴同樣連入兩球，仲要追成2:3一腳係後腳入，然後補時階段再建功，令祖記今場由拎3分變1分，所以如果要選MOM，呢位前阿仙奴翼鋒比C朗更有資格當選。
C朗賽後接受訪問，就話自己都已經好盡力，要怪就怪隊友成日犯錯：「足球就係咁，我好滿意啲入球，但就唔係賽果囉！喺最後幾分鐘明顯成隊都走下坡，咁帕爾馬咪把握到我哋犯錯，追成平手囉！我唔覺得我哋真係狀態水平唔夠好，或者被啲額外訓練影響咗，但我覺得我哋都唔需要太緊張或者覺得有壓力。」其實，C朗講得冇錯，祖記仲領先第2位嘅拿玻里9分咁多，只不過唔好太掉以輕心，集中力好啲就唔會再無謂失分。