大橋馬拉松 - 左丁山

大橋馬拉松 - 左丁山

港珠澳大橋、高鐵啟用後,內地來港非過夜客立即增加,帶動2018年全年遊客數目上升近11 %至6千5百萬人,不過新橋新路之新奇效應逐漸消失之後,2019年是否還會有遊客增長?目前未可確定。據經常在周末返回廣州嘅內地留港畢業生記者C所講:「搭高鐵最煩就係定時定候,入閘都需時,排隊排成40分鐘,而去深圳不過十零分鐘,有啲朋友𠵱家索性唔搭高鐵,行番舊路用巴士、火車咯。」咁講法,唔怪得「星島日報」有報道話港鐵欲增加高鐵人流,將高鐵地鐵化,乘客買高鐵車票可不分班次,檢查之後入閘,只要有車就上。如此一來,好多乘客可能冇位坐,好似依家搭東鐵頭等咁樣!記者C話:「冇所謂啦,由中環坐地鐵到青衣島,你估又一定有位坐咩,企三四十分鐘好閒啫。」年青人或許如此,但長者就未必喜歡咯。

港珠澳大橋就係車流稀少,差不多位位旅客都係坐金巴,坐巴士有度好,就係在天朗氣清之日,欣賞海景及整體工程一番。工程C坐過一次之後忽發奇想,現在咁多人喜歡馬拉松或者踏單車,橫掂條橋冇乜車行,由香港與珠海或澳門合作辦港珠澳大橋馬拉松或單車馬拉松賽,必定可以吸引全世界注意,可吸引大量參賽者,為香港宣傳。

條橋又幾好喎,向一位旅遊界權威講起,佢就潑冷水說:「唔係話唔得,但可能有現實困難。我試過揸車行大橋去珠海,發覺兩個問題,第一,從大橋落斜入隧道及上番路面一段,路面非常斜,騎單車與跑步一定好吃力,唔知捱唔捱到。第二,橋面好大風,我架車直情有啲飄移,如果舉辦馬拉松單車賽,要搵專家做好安全性研究先,否則比賽之日遇上微雨大風,有選手發生意外,咁就該煨咯!」權威人士果然想得周到,辦大型世界級賽事唔係想像中咁易,總要安全第一嘛。見到權威人士咁好傾,於是問佢點解購物團逼爆土瓜灣,佢話2014年每日有600團來港,現在已大幅度減少至大約每日200團,但昔年觀塘、北角有旅遊團購物區,𠵱家租金貴,北角觀塘已經冇咗據點,剩番土瓜灣一地租金夠便宜,飯店招待每餐只係30元,食青瓜炒青瓜之類餸菜,平通港九新界,故此購物旅遊團自然集中在土瓜灣區,要將呢啲團分流,並不容易。